Radio Madhesh Masla 106.4 MHz

बज्जिका विकासके लेल विशेष अन्तरक्रिया भेल हए सम्पन्न

बज्जिका साहित्य संगम रौतहट बज्जिका विकासके लेल विशेष अन्तरक्रिया सम्पन्न कएले हए । रेडियो मधेस मसला एफएम गरुडामे संगमके अध्यक्ष श्याम सहनी चन्द्रांशुके अध्यक्षतामे सम्पन्न अन्तरक्रियामे बज्जिका भाषा, साहित्य आ संस्कृतिके विकासके लेल गहन छलफल कएलगेल हए । कार्यक्रममे साहित्यकार सञ्जय मित्र, बज्जिका खबर ब्लग स्पट डट कमके संस्थापक सम्पादक मनोजकुमार चौधरी, साहित्यकार राम आधार पासवान लगायतके लोग मन्तव्य रखइत बज्जिका भाषाके प्रदेशके भाषा बनाबेके लेल पहल करेके सुझाव देले छत । बज्जिका यात्राके सर्लाही, महोत्तरी आ धनुषातक जोडेला भी साहित्यकार पासवान जोड देले छत । कार्यक्रममे बज्जिका पत्रकार संघ नेपालके अध्यक्ष राजेश्वर पान्डे, बज्जिका साहित्यकार शेख चाँद अलि, समतोलिया मुखिया, संगीताकुमारी सहनी मन्तव्य व्यक्त करइत बज्जिका भाषा आ साहित्यके संस्कृति तथा कलासे जोडके प्रचार प्रसारमे लेजनाइ जरुरी रहल स्पष्ट कएले छत । कार्यक्रममे भोला पासवान, किशुनदयाल यादव, लगायतके लोग बज्जिका विकासके लेल विचार व्यक्त करइत बज्जिका साहित्यके प्रचार होनाइ जरुरी रहल बतएले छत । बज्जिका भाषाके सबसे पहिले प्रकाशित होएबाला आ अभीतक प्रकाशन होते आरहल बज्जिकार्पण साहित्यिक पत्रिकाके प्रकाशनके जिम्मा अब बज्जिका साहित्य संगम लेले हए । नियमित अनियमितरुपसे प्रकाशन होते आरहल बज्जिकार्पण पत्रिकाके उनइसमा अंक प्रकाशनके क्रममे रहल हए । कार्यक्रममे बज्जिका साहित्यकार, बज्जिका गायक तथा लेखकलोगके सहभागिता रहल रहे ।

गायक रविन्द्र पटेलके बज्जिका भक्तिगीत अब यूटुबमे

गायक तथा लेखक रविन्द्र पटेलके नयाँ बज्जिका भक्ति एलबम सावन बडा पावन यूटुबमे लोड भेल हए । सर्लाही, रौतहट आ बाराके दर्जनो एफएम रेडियोमे बजरहल बज्जिका भक्तिगीतके अब यूटुबमे भी सुनसकेके व्यवस्था भेल हए । यूटुबके सिएन प्रोडक्सनमे जाके सावन बडा पावन खोललापर बज्जिका भाषाके भक्ति एलबम सुन सकइछी ।

सेलर मिलके फितामे लपेटाके बारामे एकजनेके भेल हए मृत्यु

बाराके सिम्रौनगढमे एगो पचास बरिसके आदमीके मिलके फितामे लपेटाके मृत्यु भेल हए । बाराके सिम्रौनगढ नगरपालिका वार्ड नम्बर १ खजानीके रहनिहार करिब ५० बरिसके वीरेन्द्र महतोको अपने सेलर मिलमे धान कुटेके क्रममे मिलके पाटा टुटके लागल रहे । पाटाके चोटसे महतोके घटनास्थलपर ही मृत्यु भेल हए । घटनाके सम्बन्धमे थप अनुसन्धान होरहल बारा प्रहरी जनएले हए ।

पर्सामे एकजने आदमी मिलल हए मृत

पर्सा जिलामे एकजने आदमी मृत अवस्थामे मिलल हए । पर्साके वीरगंज महानगरपालिका वार्ड नम्बर २ छपकैयाके रहनिहार एकजने मृत अवस्थामे मिलल हए । सडकके कातमे वीरगंजके आदर्श टोलाके रहनिहार ४५ बरिसके सुनिल साह कानु शुक्रबार मृत अवस्थामे मिलल हए । साहके मृत्युके विषयमे पर्सा पुसिल अनुसन्धान कररहल हए ।