Radio Madhesh Masla 106.4 MHz

करेन्ट लागके धरहरीमे एगो युवकके भेल मृत्यु

करेन्ट लागके रौतहटमे एगो युवकके शनिवार मृत्यु भेल हए । बिजुलीसे काम करइत अवस्थामे रौतहटके देवाही गोनाही नगरपालिकाके धरहरी गाँओके करिब २५ बरिसके एगो युवक गौतम पँडितके करेन्ट लागके मृत्यु भेल हए । करेन्ट लागके गम्भीर अवस्थामे इलाजके लेल गरुडा लेअएलापर अनामिका हस्पिटलमे पुगलापर मृत होगेल रहे । अस्पतालमे पुगलापर हस्पिटलके चिकित्सक मृत घोषित कएले रहे । घटनाके विषयमे थप अनुसन्धान होरहल इलाका प्रहरी कार्यालय गरुडाके इन्स्पेक्टर चतुर्भुज ओझा जानकारी करएले छत ।

साओन भेल आजसे सुरु, बहुत लोग बनल साकाहारी

साओन महिना शनिवारसे सुरु भेल हए । आषाढके पुर्नेमा समाप्त होएलाके साथे शुद्ध साओन महिना सुरु भेल हए । विक्रम सम्वतके मोताबिक ११ दिन पहिले ही साओन महिना चढल रहे लेकिन तिथिके हिसाबसे साओन महिना आजसे सुरु भेल हए । साओन महिना सुरु होएते बहुत लोग साकाहारी बनल हए । साओनके महिना देवाधिदेव महादेवके महिना मानल गेल हए । साओन महिनाभर महादेवके मन्दिरमे सर्वसाधारण लोगके भीड लागल रहले । मुख्य कके सोमवारके दिन शिवालयमे दर्शनार्थीके भीड जमल रहइअ । रौतहटके प्रसिद्ध शिवनगर मन्दिरमे साओन महिनाभर एतबार आ सोमारके दिन अत्यधिक भीड   रहले । रौतहटसे लाखो लोग भारतके झारखंड प्रदेशके देवघरमे रहल बाबाधाम साओनमे जाएके चलन रहल हए ।

बारामे एगो युवक अपने घरमे मिलल मृत

बारामे एकजने युवक अपने घरमे मृत अवस्थामे मिलल हए । बारा जिलाके निजगढ नगरपालिका वार्ड नम्बर ७ बँकु टोलाके रहनिहार २९ बरिसके रोशन थापा मगर अपने घरमे शनिवार मृत अवस्थामे मिलल हए । घटनाके विषयमे बारा पुलिस अनुसन्धान कररहल खबर हए ।

करेन्ट लागके बारामे एगो बालकके भेल हए मृत्यु

करेन्ट लागके बारा जिलामे एगो बालकके मृत्यु भेल हए । बारा जिलाके सिम्रौनगढ नगरपालिका वार्ड नम्बर १० फेटाके जोगिन्दर पासवानके १३ बरिसके बेटा निपायल पासवानके करेन्ट लागके मृत्यु भेल हए । मोटरसे धानके बिआ पटाबेके करेन्ट लगलापर इलाजके लेल कलैया अस्पतालमे इलाजके क्रममे मृत्यु भेल हए । घटनाके विषयमे बारा पुलिस थप अनुसन्धान कररहल हए ।

श्रावणी मेलाके सुल्तानगंजमे भेल हए उदघाटन

साओन महिनाके अएते श्रावणी मेलाके सुरुआत भेल हए । नेपाल आ बिहारसे अत्यधिक श्रद्धालु जाएबाला बाबाधामके जल भरेबाला जगह सुल्तानगंजमे श्रावणी मेलाके उदघाटन कएलगेल हए । श्रावणी मेलाके उदघाटन होएलासे सुल्तानगंज बोलबम कामरियासे पूरा भरल हए । सुल्तानगंज बोलबमसे गुल्जार बनल भारतीय मिडिया लिखले हए । पहिल सोमारीके बाबाधाममे जल चढाबेके लेल लाखो लोग शनिवार बाबाधामके ओर प्रस्थान कएले हए । पहिल सोमारीके लेल बहुत लोग बाबाधामके लेल यात्रा सुरु कएले हए । पहिल सोमारीके दिन जल चढाबेला रौतहटसे भी कुछ लोग प्रस्थान करचुकल हए ।

बरगिनियासे विभिन्न बालमजदुरके कराबलगेल हए मुक्त

एसएसबीके जवान बैरगनिया रेलवे स्टेशनसपर कारबाही कके मुम्बईके विभिन्न फैक्ट्रीमे बाल मजदुरीके लेल लेजारहल दश बाल श्रमिकके मुक्त कराबलगेल हए । साथमे ६ जने बिचौलियाके पक्राउ कएलगेल हए । सभी बाल श्रमिकके कर्मभूमि एक्सप्रेससे बाल मजदुरीके लेल मुम्बई लेजाइत रहे । पकडाएल बिचौलियामे सर्लाहीके बलरा निवासी विनोद राम, रौतहटके बसबिटी जिंगडियाके शेख नजिर आलम, पूर्वी चम्पारणके शीशहनी गाँओके मोहम्मद फैयाज आलम, कुशमहबा गाँओके मोहम्मद असफाक, पँडरीके राम प्रवेश महतो, सीतामढी रिगाके सोनु कुमार रहल हए । असिस्टेन्ट कमान्डेन्ट अमरनाथ गुप्ताके मोताबिक बिफेके साँझके रक्सौलसे मुम्बई जाएबाला कर्मभूमि एक्सप्रेस रेलसे बाल श्रमिकके बैग, कपडा आ कन्सन्ट्रक्सन कम्पनीमे काम करबाबेके लेल लेजाएके तैयारीमे रहल दश बाल श्रमिकके उद्धार कएलाके साथे ६गो बिचौलियाके पक्राउ कएलगेल हए । गुप्ताके मोताबिक बाल श्रमिकमे सातगो भारतीय आ तीनगो नेपाली रहल हए  । अइसही बिचौलियामे चारजने भारतीय आ दूजने नेपाली सामिल रहल हए ।