Radio Madhesh Masla 106.4 MHz

वर्षाके माग करइत ग्रामीण समुदाय पूजाआजा करेके कएलक सुरुआत

मध्य खेतीके समयमे पानी रुकगेलासे किसानके परसानी बढल हए । दू हप्ता पहिले खुब निमनसे वर्षा भेल लेकिन धानके बिआ तैयार नरहे । दू हप्तासे वर्षा रुकलाके कारण धान रोपेबाला किसान भी छटपटा रहल हए । धान रोपले किसान भी पानी नहोएलासे धान खेतेमे सुखेके होएलासे अत्यधिक चिन्तित बनल हए । धानके खेतमे दरार फाटके किसानके चिन्ता बढएले हए । विगत दू दिनसे हर दिन बादल लागरहल लेकिन वर्षा नहोएलासे किसानके चिन्ता कम होएके जगहपर आउरो बढल हए । पानी नपरलासे निराश किसान अब देवीदेवताके पूजा कररहल हए । रौतहटके वृन्दावन नगरपालिकाके स्थानीयबासी देवी देवताके पूजा कररहल हए । विर्ता चौकसे हल्का उत्तर जाके पछिम जाएके रास्तासे कुछ पछिममे रहल पुरान धामोधमियाइन देवीके मन्दिरमे आँकरपाथरके स्थानीयबासी पूजाआजा कएले हए । पानीके जरुरत परलापर श्रद्धापूर्वक पूजा कएलापर वर्षा होएके परम्परागत विश्वासके आधारपर स्थानीयबासी मंगलवार धामोधमियाइन देवीके पूजा कएले हए । विभिन्न बाजागाजा तथा कीर्तन भजनके साथ श्रद्धापूर्वक स्थानीय नरनारी पूजाआजा कएले हए । देवी धामोधमियाइन खुसी होएलापर वर्षा होएके पूर्ण विश्वास आँकरपाथर बासीके रहल स्थानीय दिनेश देहाती जानकारी करएले छत ।

बिहारमे प्लास्टिकके बन्द करेला बनेबाला भेल हए कानुन

भारतके बिहारमे मदिरापर प्रतिबन्ध लगएलाके बाद अब पोलिथिनपर भी प्रतिबन्ध लागेबाला भेल हए । पोलिथिनसे अत्यधिक हानि होरहल अवस्थामे बिहारमे पोलिथिनपर प्रतिबन्धके कानुन निर्माण होएबाला भेल हए । पटना हाइकोर्टके आदेश बमोजिम बिहार सरकारके मुख्य सचिव जल्दिए पोलिथिनपर प्रतिबन्धके कानुन निर्माण होएके बतएले छत । बिहारके पोलिथिन मुक्त करेला कानुन जल्दिए बनेबाला भेल हए । तत्काल ही पटना हाइकोर्ट बोधगयाके पूरे किसिमसे पोलिथिन मुक्त करेके आदेश देले हए । एकरालेल अन्तिम कारबाही करेला भी हाईकोर्ट बिहार सरकारके आदेश देले हए । बिहार सरकारके विशिष्ट अधिकारीलोगके उपस्थितिमे हाइकोर्ट बोधगयाके तत्काल पोलिथिन मुक्त करेला आदेश देले हए । विशिष्ट अधिकारीलोग बिहारके पोलिथिन मुक्त करेके क्षेत्रमे अपन कार्ययोजना भी अदालतमे पेश कएले हए । बिहारके मदिरा निषेधित राज्य बनएलाके बाद अब पोलिथिन मुक्त घोषणा करेके क्षेत्रमे ठोस काम होए जारहल विषयसे बिहारमे बहुत चर्चा प्राप्त कएले हए ।

मुस्लिम अगुवा राँकीके स्वास्थ्य अवस्था बुझे पुगरहल छत विशिष्ट लोग

रौतहटके मुस्लिम समुदायके एगो विशिष्ट बुद्धिजीवीके रुपमे परिचित यमुनामाई गाँओपालिकाके मुस्लिम अगुवा महम्मद मकसुद राँकीके स्वास्थ्य अवस्था बुझेला विशिष्ट लोग अस्पतालमे पुगरहल छत । स्वास्थ्य खराब होएलापर काठमान्डुके बी एन्ड बी अस्पतालमे भर्ना होके इलाज चलरहल वरिष्ठ बुद्धिजीवी राँकीसे भेट करइत स्वास्थ्य स्थिति बुझेला पूर्व प्रधानमन्त्री माधव कुमार नेपाल, पूर्व मन्त्री प्रभु साह, बी एन्ड बी अस्पतालके संस्थापक एवं संचालक प्रमुख लगायतके लोग पुगल छत । अइसही विभिन्न साँसद, नेता, बुद्धिजीवी, मुस्लिम समुदायके अगुवा लगायतके लोग भी राँकीके स्वास्थ्य स्थिति बुझेके लेल पुगरहल छत । राँकीके स्वास्थ्यमे धीरे धीरे सुधार होरहल स्रोतके कहनाम हए ।

बङमतीसे लमाहा कृतिके विमोचनसे पहिल ही बढरहल हए माग

प्रकाशन होके विमोचनमे कुछ विलम्ब होरहल बङमतीसे लमाहा बज्जिका गीत संग्रहके माग बढरहल हए । सार्वजनिक होएसे पहिले ही सर्लाही, रौतहट आ काठमान्डुके विभिन्न स्थानसे कृतिके माग होरहल देखलगेल हए । कृतिके लेखक विश्वराज अधिकारीके बाल्यकाल बितल गुजरा नगरपालिकाके सिमरा भवानीपुरमे कृतिके माग बढल हए । अधिकारी पढले स्कुलमे पहिल किस्ता बीस थान किताब पहुँचाबलगेल हए । बज्जिका भाषा, साहित्य आ संस्कृतिके बहुमुखी प्रतिभा संजय महतो राज गीतकार तथा साहित्यकार अधिकारीके पढले सिमरा भवानीपुर विद्यालयमे बीस थान कृति पहुँचएले छत । कृतिकार अधिकारी अभी अमेरिकामे रहके प्राध्यापन पेसामे संलग्न छत आ बज्जिका भाषाके विकासमे योगदान देरहल छत ।

मोबाइल चार्ज करेके क्रममे सर्लाहीमे दूजनेके भेल हए मृत्यु

करेन्ट लागके सर्लाहीमे दूजने युवकके मृत्यु भेल हए । सर्लाहीके हरिपुर्वा नगरपालिका वार्ड नम्बर ९ बगेवाके रहनिहार पल्टु खत्वेके १४ बरिसके बेटी सुनिता  खत्वे आ ३६ बरिसके नरेन्द्र चौधरी सहितके लोग अपना घरमे मोबाइल चार्ज करेके क्रममे करेन्ट लागल रहे । हाई भोल्टेजके कारण करेन्ट लागके दुनुजनेके घटनास्थलमे ही मृत्यु भेल हए । करेन्ट लागके ओही गाँओके २७ बरिसके पूर्णदेवी महतो भी घाएल भेल हए । घाएल महतोके इलाज स्थानीय मेडिकलमे होरहल हए ।

करेन्ट लागके बारामे एकजने प्रौढके भेल हए मृत्यु

बारामे खेतमे पानी पटाबे गेल एकजने प्रौढ किसानके करेन्ट लागके मृत्यु भेल हए । बारा जिलाके कलैया नगरपालिका वार्ड नम्बर १२ धर्मनगरके रहनिहार ५५ बरिसके किसान चोकट महतो धानुकके करेन्ट लागके मृत्यु भेल हए । अपने खेतमे मोटरसे पानी पटाबेके क्रममे करेन्ट लागके घाएल भेल अवस्थामे इलाजके लेल मटिअर्वामे रहल अनिल पोलिक्लिनिकमे लेजाएके क्रममे रस्ते ही मृत्यु भेल हए । घटनाके सम्बन्धमे बारा पुलिस आवश्यक अनुसन्धान कररहल खबर प्राप्त भेल हए ।

पोखरीमे डुबके पर्सामे एगो बालकके भेल हए मृत्यु

पोखरीमे डुबके पर्सा जिलामे एगो बालकके मृत्यु भेल हए । पर्सा जिलाके बहुदरमाई नगरपालिका वार्ड नम्बर ४ के रहनिहार रुपचन्द महतोके १२ बरिसके बेटा रामबाबु महतोके डुबके मृत्यु भेल हए । घरके लगेमे रहल मछरी पोसेबाला पोखरीमे नहाएके क्रममे डुबके मृत्यु भेल हए । घटनाके विषयमे थप अनुसन्धान होरहल प्रहरीके कहनाम रहल हए ।

भारतीय गाडीके ठोकरसे पर्साके एगो महिलाके बारामे भेल हए मृत्यु

भारतीय गाडीके ठोकरसे बारा जिलामे पर्सा जिलाके महिलाके मृत्यु भेल हए । बाराके सिमरा जितपुर उपमहानगरपालिका वार्ड नम्बर ७ मे एचआर ३८ डबलु ३२९४ नम्बरके एलपि गैस टैंकरसे एगो पैदल यात्रुके ठोकर मारलासे घटनास्थलमे ही मृत्यु भेल हए । पैदल यात्री पर्सा जिलाके पटेर्वा सुगौली गाँओपालिकाके ३८ बरिसके प्रेमशीला चौधरी रहल हए । चौधरीके टैंकरसे ठोकर लगलापर घटनास्थलपर ही मृत्यु भेल हए । ठोकर मारेबाला गाडी डाइबरके पुलिस नियन्त्रणमे लेले हए । घटनाके सम्बन्धमे थप अनुसन्धान पुलिस कररहल खबर प्राप्त भेल हए ।

पूर्व साँसदके घरसे भेल हए चोरीके स्कारपिओ बरामद

पूर्व साँसद जयप्रकाश थारुके घरसे चोरीके स्कारपिओ बरामद भेल हए । नेपाल प्रहरीके सहयोग लेके भारतीय प्रहरी पूर्व साँसद थारुके जीरा भवानी गाँओपालिका वार्ड नम्बर ४ भवानीपुरमे रहल घरमे राखल बीआर ०५ सिए ३३९० नम्बरके स्कारपिओ गाडी बरामद भेल हए । बरामद गाडी भारतीय प्रहरीके जिमा लगाबलगेल हए । नेपाल प्रहरीके अपराध शाखा आ भारतीय प्रहरीके टोली सादा पोसाकमे पूर्व साँसद थारुके घरमे जाके घरमे रहल स्कारपिओ गाडीके टेक्टरसे तानके भारत पश्चिम चम्पारणके इनर्वा थानातक पुगएले हए । स्रोतके मोताबिक गाडी चोरीके रहल आ भारतीय प्रहरी पत्ता लगबइत पुर्व साँसद चौधरीके घरमे राखल सूचना प्राप्त होएलापर नेपाल प्रहरीके सहयोग लेके गाडी निकालले हए । जिला प्रहरी कार्यालय पर्सा अपराध शाखाके प्रमुख प्रहरी निरीक्षक राज दत्त घटनाके विषयमे अपना जानकारी नरहल प्रतिक्रिया देले छत । इलाका प्रहरी कार्यालय सेढवाके प्रहरी नायब निरीक्षक राजेश चौधरी नेपाल प्रहरीके सहयोगमे भारतीय प्रहरी सादा पोसाकमे आएल आ अपनाके सम्भावित घटना होए नदेबेके लेल पोसाकमे खटएले प्रतिक्रिया देले छत ।