Radio Madhesh Masla 106.4 MHz

एतबारके साँझमे हेराएल दुनु युवकके मिलल हए बागमतीमे लास

एतबारके साँझसे बागमती नदीमे हेराएल सर्लाहीके दुनु युवकके लास मिलल हए । सर्लाहीके लालबन्दी नगरपालिका वार्ड नम्बर ७ रानीगंजके रहनिहार २२ बरिसके सञ्जय बस्नेत आ २२ बरिसके राजेश ब्लोन एतबारके दिन साँझमे बागमती नदीके नुनथर महादेव मन्दिरके पछाडि नहाएगेल अवस्थामे बेपत्ता भेल रहे । पौँडे गेल दुनु युवक साँझमे ही वेपत्ता भेल रहे । वेपत्ता दुनु युवकके खोजी रौतहट आ सर्लाही पुलिस करइत आएल रहे । बागमती नदीमे आएल दाहरमे दहके युवक डुबगेल रहे । दुनु युवकके लास करिब एक किलोमिटर दखिन मिलल हए ।

विद्यालय लेखासम्बन्धी तीन दिवसीय तालिम सम्पन्न

गरुडा नगरपालिका अन्तर्गतके करिब सभी विद्यालयके प्रधान शिक्षक, लेखापाल आ अन्य एकजने शिक्षक समेतके सहभागितामे तीन दिवसीय विद्यालय लेखा प्रणाली सम्बन्धी तालिम सम्पन्न भेल हए । नमुना मावि गरुडामे सम्पन्न तालिममे विद्यालयके लेखा प्रणालीके दुरुस्त राखेके विषयमे व्यावहारिक छलफल भेल सहभागी रेणु गुप्ता जानकारी करएले छत ।

जिंगडियामे दलित परिवारके प्राप्त भेल हए सोलार

रौतहटके गरुडा नगरपालिका वार्ड नम्बर ८ जिंगडियाके १५ परिवारके सोलार प्राप्त भेल हए । मावि जिंगडियामे वशिष्ट राय यादवके अध्यक्षतामे भेल सोलार वितरण कार्यक्रममे जिंगडियाके पुर्वारी टोलाके १५ दलित परिवारके सोलार प्रदान कएलगेल हए । गरुडा नगरपालिकाके मेयर इन्नु राय यादवद्वारा प्राप्त सोलार वितरण कएलगेल कार्यक्रममे वशिष्ट राय यादव जानकारी करएले छत । कार्यक्रमके अवसरपर स्थानीय सजन पाल, राम बालक प्रसाद गुप्ता, अनिल पाल लगायतके लोगके उपस्थिति रहल शिक्षक नन्दु साह बनिया जानकारी करएले छत ।

प्रदेश २ मे दारुपर प्रतिबन्ध लगाबेके तयारी होरहल गृहमन्त्री कएले छत खुलासा

प्रदेश २ मे दारुपर प्रतिबन्ध लगाबेके तैयारी होरहल प्रदेश गृहमन्त्री ज्ञानेन्द्र यादव खुलासा कएले छत । कुछे महिनामे प्रदेश २ के आठ जिलामे मदिरापर प्रतिबन्ध लगाबेके तैयारीके साथ प्रदेश सरकार अगाडि बढल हए । आन्तरिक मामिला तथा कानुनमन्त्री यादव प्रदेश सरकार मदिरामुक्त प्रदेशके कल्पना अनुसार अगाडि बढल बतएले छत । गृहमन्त्री यादव कानुन बनाके जल्दिए मदिरा उत्पादन आ बिक्रीपर रोक लगाबेके बतएले छत । एकरा विषयमे प्रदेश सरकार आ प्रदेश सभामे भी प्रारम्भिक तयारी सुरु भेल हए । प्रतीक दैनिकसे बातचित करइत गृहमन्त्री यादव प्रदेश २ के आठ जिलामे केतना उद्योग आ केतना दोकान रहल विषयमे तथ्यांक संकलन करेके काम एक महिनासे चलरहल मन्त्री यादव खुलासा कएले छत । तथ्यांक संकलन होएलाके बाद कानुन नबनलातक सुरुमे निरुत्साहित बनाबेके आ ओकराबाद प्रदेश सभामे विधेयक पास कराके मदिरापर रोक लगाबेके योजनामे सरकार रहल स्पष्ट कएले छत । भारतके बिहारमे बिहार सरकार सन् २०१६ के अप्रिल १ तारिखसे मदिरापर पुरा प्रतिबन्ध लागल हए । बिहारमे मदिराके उत्पादन, ओसारपसार आ बिक्री वितरणपर प्रतिबन्ध लागेलापर व्यावसायीके अरबों रुपैयाके नोक्सानी भेल रहे ।

वीरगंजमे दुगो नाबालकके डुबके भेल हए मृत्यु

पर्सा जिलाके वीरगंजमे दुगो बालकके डुबके मृत्यु भेल हए । पर्सा जिलाके वीरगंज महानगरपालिका वार्ड नम्बर ३० लालपर्सामे रहल पोखरीमे डुबके दुजनेके मृत्यु भेल हए । गर्मी होएलापर पोखरीमे नहाएके क्रममे दुनुजने डुबल रहे । डुबलापर अशक्त होगेल अवस्थामे दुनुजनेके उद्धार कके अस्पताल पुगाबलगेल रहे । स्थानीय भरत साहके १२ बरिसके बेटा सुमित कुमार साह आ १० बरिसके बेटा अमित कुमार साह दुनुजनेके वीरगंजमे रहल तराई अस्पतालमे इलाजके क्रममे ही मृत्यु भेल हए । घटनाके सम्बन्धमे पर्सा पुलिस आवश्यक अनुसन्धान कररहल हए ।

सर्लाहीके एकजने काठमान्डुमे परल हए पक्राउ

सर्लाहीके एकजने काठमान्डुमे पक्राउ परल हए । सोनाके गहना चोरी कएले आरोपमे काठमान्डुके बसन्तपुरमे रहते आएल सर्लाहीके २२ बरिसके युवक आयुष कार्की पक्राउ परल हए । कार्कीके साथे बसन्तपुरमे रहइत आएल लमजुङके २८ बरिसके विष्णु गुरुंग भी पक्राउ परल हए । दुनुजने चोरी कएले सोनाके गहना किनले आरोपमे काठमान्डुके चावहिलमे रहइत आएल भारत कलकत्ताके ३४ बरिसके सुनील राउत आ २२ बरिसके खेकन मतालिकके भी पुलिस पक्राउ कएले हए । राउत आ मतालिकसे सस्ता दाममे सोनाके गहना किनेबाला किलागलके दोकानदार २७ बरिसके मनोरंजन मन्डलके भी पुलिस पक्राउ कएले हए । काठमान्डु महानगरपालिका वार्ड नम्बर १४ कलंकी स्युचाटारसे सावन ४ गते चोरी भेल घटनाके अनुसन्धानके क्रममे पुलिस दुनु जनेके पक्राउ कके सोधपुछ करइत गेलापर अइसन रहस्य खुलइत गेल हए । घटनाके सम्बन्धमे पुलिस अनुसन्धान अगाडि बढारहल देखलगेल हए ।