Radio Madhesh Masla 106.4 MHz

गरुडा नगरपालिकाके सभी वार्डमे वडास्तरीय नागरिक सुनुवाई कार्यक्रम भेल सम्पन्न

रौतहटके गरुडा नगरपालिकाके सम्पूर्ण वडामे वडास्तरीय नागरिक सुनुवाई कार्यक्रम सम्पन्न भेल हए । गरुडा नगरपालिका कार्यालयके सहयोगमे बज्जिका साहित्य संगम रौतहटके आयोजना तथा बज्जिका पत्रकार संघ नेपालके विशेष सहयोगमे गरुडा नगरपालिकाके सम्पूर्ण वडामे वडास्तरीय नागरिक सुनुवाई कार्यक्रम सम्पन्न भेल हए । बुधवारके दिन सबेरे गरुडा नगरपालिका वार्ड नम्बर ४ के वडास्तरीय नागरिक सुनुवाई कार्यक्रम मावि गरुडामे सम्पन्न भेल हए । वडाध्यक्ष चुनचुन प्रसाद साहके अध्यक्षता तथा गरुडा नगर उद्योग वाणिज्य संघके अध्यक्ष राम भरोस राय यादवके प्रमुख आतिथ्यमे भेल कार्यक्रममे उपस्थित सैकडो लोग गरुडाके विकास योजना, भौतिक पूर्वाधार, शिक्षा तथा स्वास्थ्य लगायतके विषयमे जबाफके माग कएले रहे । वडा नम्बर ४ के वडास्तरीय नागरिक सुनुवाई कार्यक्रम सम्पन्न होएलाके साथे नगरपालिकाके सम्पूर्ण वार्डके सार्वजनिक सुनुवाई सम्पन्न भेल हए ।

अधिकांश अस्थायी शिक्षक काठमान्डु कएले हए प्रस्थान

रौतहटके अधिकांश अस्थायी शिक्षक काठमान्डु प्रस्थान कएले हए । इहे शनिवारके दिन २२ हजारसे बेसी पदके लेल २३ हजारसे बेसी अस्थायी शिक्षक परीक्षा देरहल छत । अस्थायी शिक्षकके स्थायी करेके अन्तिम समय होएलासे अस्थायी शिक्षक अपन भागके परीक्षा देबेके लेल काठमान्डु पहुँचल हए । प्राथमिक, निम्न माध्यमिक आ माध्यमिक तहके मिलाके नौगो क्राइटेरियामे परीक्षा होए जारहल हए । काठमान्डुमे मध्यमांचल विकास क्षेत्रके विभिन्न जिलासे करिब नब्बे प्रतिशत अस्थायी शिक्षक काठमान्डु पुगल हए । काठमान्डुमे ही रौतहटके तीनो तहके अस्थायी शिक्षकके परीक्षा होएबाला होएसे करिब सभी शिक्षक काठमान्डु पुगल हए । परीक्षाके तैयारी करेला आ अपना केन्द्रपर पहिले ही पुगके अपनाके सुरक्षित महसुस करेला अधिकांश शिक्षक काठमान्डु पुगल हए ।

सडक बनल लेकिन पानीके निकास नहोएलासे गरुडाके विभिन्न टोलामे जमल हए पानी

गरुडा नगरपालिकाके वार्ड नम्बर ४ गरुडामे गरुडा नगरपालिका, वार्ड नम्बर ४ कार्यालय आ दोसराओरसे भेल विभिन्न सडक विकासके चलते कुछ टोलामे पानी जमल हए । सडकके स्तर उन्नति भेल लेकिन पानीके निकास नहोएलासे विभिन्न टोलामे पानी जमल देखलगेल हए । गरुडा तरकारी बजारसे दखिन खेतमे पानी जमल हए । गरुडाके मित्रनगरसे पछिम कलवार धर्मशालासे पुरुब भी ओतने पानी जमल हए । अइसही चिनीमिल चौकसे महम्मदपुर जाएके लेल बनल नयाँ सडकसे उत्तर भी पानी जमल हए । सडकके निर्माण भेल लेकिन पानीके निकास नहोएलासे खास बेसी वर्षा नहोएलापर भी गरुडाके विभिन्न टोलामे पानी जमलासे सम्बन्धित निकायसे स्थानीयबासी पानी निकासके व्यवस्था करेला माग कएले हए ।

कान्तिपुर आ काठमान्डु पोस्टके सम्पादक देले छत संयुक्त राजीनामा

देशके चर्चित एगो नेपाली दैनिक आ एगो अंग्रेजी दैनिकके सम्पादक राजीनामा देले छत । कान्तिपुर पब्लिकेशन्स प्रालिके मुख्य प्रकाशन कान्तिपुर दैनिकके प्रधान सम्पादक सुधीर शर्मा आ काठमाडौँ पोस्टके प्रधान सम्पादक अखिलेश उपाध्याय संयुक्त राजीनामा देले   छत । बितल दश बरिससे दुनु प्रधान सम्पादक दुनु प्रमुख दैनिकके नेतृत्व करते आएल  छत । दुनु प्रधान सम्पादक अपना राजीनामाके विषयपर सहकर्मीसे ब्रिफिङ कएले छत ।