Radio Madhesh Masla 106.4 MHz

प्रदेश २ के साँसदके साथे प्रधानमन्त्री ओली कएले छत छलफल

प्रधानमन्त्री एवं नेकपाके अध्यक्ष केपी शर्मा ओली प्रदेश २ के साँसदलोगके साथे छलफल कएले छत । नेकपासे प्रदेश सभा आ प्रतिनिधिसभामे निर्वाचित सम्पूर्ण सासदसे प्रदेश २ के विकास निर्माणके विषयमे छलफल कएले छत । प्रधानमन्त्री निवास बालुवाटार काठमान्डुमे शनिवार मानव विकास सूचकांकमे देशके सबसे पछाडि परल प्रदेशके रुपमे रहल प्रदेश २ के भौतिक विकाससे लेके शिक्षा, स्वास्थ्य, रोजगारी, चुरे संरक्षण, दाहर नियन्त्रण लगायतके विषयपर छलफल भेल साँसद प्रभु साह जानकारी करएले छत । नेकपा नेता समेत रहल साँसद साह प्रदेश २ मे रहल भ्रष्टाचार आ अनियमितताके रोकेके विषयमे प्रधानमन्त्री सुझाव मगले बतएले छत । प्रदेशमे सरकारी कार्यालयसे प्रवाह होएबाला सुविधाके प्रभावकारी बनाबेके, उँख किसानके भुक्तानी, महिला हिँसा, शिक्षाके स्तर सुधारके विषयमे भी प्रधानमन्त्रीसे खुलके छलफल भेल नेकपाके साँसद रेखाकुमारी झा बतएले छत । प्रदेश २ मे प्रभावकारी ढंगसे काम करेके प्रतिबद्धता जनएले साँसद झा स्पष्ट कएले छत ।

महम्मदपुर, मलाही आ जयनगरमे सार्वजनिक सुनुवाई कार्यक्रम भेल हए सम्पन्न

रौतहटके गरुडा नगरपालिकाके विभिन्न वार्डमे सार्वजनिक सुनुवाई कार्यक्रम सम्पन्न भेल हए । गरुडा नगरपालिकाके सहयोगमे बज्जिका साहित्य संगम रौतहटके आयोजना आ बज्जिका पत्रकार संघ नेपाल रौतहटके विशेष सहयोगमे गरुडा नगरपालिकाके वार्ड नम्बर १ जयनगर, वार्ड नम्बर ३ मलाही आ वार्ड नम्बर ५ महम्मदपुरमे सार्वजनिक सुनुवाई कार्यक्रम सम्पन्न भेल हए । वडा नम्बर १ मे सम्पन्न सार्वजनिक सुनुवाई कार्यक्रमके अध्यक्षता सरोज राय यादव कएले रहलन । अइसही वार्ड नम्बर ३ के वडाध्यक्ष कृष्णाकुमार सहनीके अध्यक्षतामे मलाहीमे आ वार्ड नम्बर ५ के वडाध्यक्ष जयमंगल राय यादवके अध्यक्षतामे महम्मदपुरमे सार्वजनिक सुनुवाई कार्यक्रम सम्पन्न भेल हए । महम्मदपुरमे आयोजित सार्वजनिक सुनुवाई कार्यक्रममे मन्तव्य व्यक्त करइत गरुडा नगरपालिकाके मेयर इन्नु राय यादव, संघीय समाजवादी फोरम नेपालके मधेस प्रदेश सदस्य वृजकिशोर प्रसाद यादव, जिला समन्वय समिति रौतहटके सदस्य राम ईश्वर राय यादव लगायतके लोग वार्ड नम्बर ५ के कामके प्रशंसा कएले छत । अइसही वडा नम्बर तीन आ वार्ड नम्बर एकमे विकास निर्माणके काम तुलनात्मक रुपसे निमन होरहलाके कारण अधिकांश वक्तालोग सन्तोष व्यक्त कएले छत ।

पिपरिया, पोठियाही आ गम्हरियामे सोमवार होरहल हए सार्वजनिक सुनुवाई कार्यक्रम

रौतहटके गरुडा नगरपालिकाके विभिन्न तीनगो वार्डमे सोमवार सार्वजनिक सुनुवाई कार्यक्रम होरहल हए । गरुडा नगरपालिकाके वार्ड नम्बर ७ पिपरिया पोखरियामे सोमवार सबेरे सात बजे वडा कार्यालयमे सार्वजनिक सुनुवाई होरहल हए । अइसही वार्ड नम्बर ६ पोठियाहीके वडा कार्यालयमे सोमवार दिनके ११ बजे सार्वजनिक सुनुवाई कार्यक्रम होरहल हए । अइसही सोमवार दुपहरियाके तीन बजे वार्ड नम्बर ९ के वडा कार्यालयमे सार्वजनिक सुनुवाई कार्यक्रम होए जारहल आयोजक संस्था बज्जिका साहित्य संगम रौतहट जानकारी करएले हए ।

अवैध भारतीय रुपैयासहित पर्सामे एकजने युवक परल हए पक्राउ

पर्सा जिलाके वीरगंजमे एकजने भारतीय युवक पक्राउ परल हए । भारतके बिहार राज्यके मोतिहारी जिलाके सुगौलीके रहनिहार २८ बरिसके अभिजीत कुमार सर्राफ अवैध भारतीय रुपैयासहित पक्राउ परल हए । वीरगंज महानगरपालिका वार्ड नम्बर १६ मे रहल रजत जयन्ती चौकपर रक्सौलसे वीरगंजके ओर चलाके लेआरहल मोटरसाइकिल बीर आर ०५ के ६४४४ नम्बरके पल्सर मोटरसाइकिलके चेकजाँच कएलापर मोटरसाइकिलके तेलके टंकीमे आधा भागमे पेट्रौल राखेबाला आ आधा भागके अवैध भारतीय रुपैया राखेबाला बनएले आ ओही टंकीमे भारतीय पाँच सय रुपैयाके दरके एक हजार चार सय ३८ थान, दू हजारके दरके ११ थान, दू सय दरके तीन सय एक थान रुपैया नुकाके लेआरहल अवस्थामे फेला परल हए । मोटरसाइकिलके टंकीसे पुलिस आठ लाख एक हजार दू सय भारतीय रुपैया बरामद कएले हए । लाखो रुपैयासहित पक्राउ परलापर भारतीय युवक सर्राफके आवश्यक अनुसन्धान आ कारबाहीके लेल राजस्व विभाग हरिहर भवन ललितपुर पेठाबलगेल पुलिस जानकारी करएले हए ।

सबारी साधनके दुर्घटनामे एकजने युवकके घटनास्थलमे ही भेल हए मृत्यु

बाराके जितपुर सिमरा उपमहानगर पालिकामे भेल एगो दुर्घटनामे परके एकजने युवकके घटनास्थलमे ही मृत्यु भेल हए । बाराके सिमरा जितपुर उपमहानगरपालिका वार्ड नम्बर १ आधाभार जंगलमे ना ४ च ६७५२ नम्बरके बोलेरो गाडी ना १९ प ३७४९ नम्बरके मोटरसाइकिलके ठोकर देलापर मोटरसाइकिल चलारहल पर्सा जिलाके पर्सौनी नगरपालिका वार्ड नम्बर ९ के रहनिहार २१ बरिसके युवक आकाश कुमार गुप्ताके घटनास्थलमे ही मृत्यु भेल हए । ठोकर मारके बोलेरो गाडीके डाइबर फरार भेल हए । फरार डाइबरके खोज तलास पुलिस कररहल खबर प्राप्त भेल हए ।