Radio Madhesh Masla 106.4 MHz

कुपोषणमुक्त नगरके कल्पना मौलापुर नगरपालिका कएले जानकारी करएले छत पूर्व मन्त्री साह

नेपाल कम्युनिष्ट पार्टीके चर्चित विकासवादी नेता एवं साँसद प्रभु साह मौलापुर नगरपालिका कुपोषणमुक्त बनेके कल्पना कएले बतएले छत । मौलापुर बजारपर नगरपालिकाद्वारा पोषणके लेल हातेमालोके सहयोगमे आयोजित वृहत पोषण सामग्री वितरण कार्यक्रमके सम्बोधन करइत साँसद साह मौलापुर नगरपालिकाके काम जनतासे जुटल होएलासे सभीके फाएदा पुगेके बतएले छत । पोषणके अभावमे नागरिकके जीवनभर होसकेबाला बेफाएदाके विषयमे विभिन्न डाक्टरलोग प्रकाश पारले रहे । चिकित्सकके सलाह मोताबिक गर्भवती महिला आ प्रसौती महिलाके दिनमे एकबेर खाना खाएके सुझावके भी नेता साह दोहरबइत बिकासके मतलब ही पहिलेके जीवनमे सुधार होनाइ होएलासे हर नागरिकके स्मार्ट बनेके लेल आग्रह कएले छत । मौलापुर नगरपालिकामे गर्भवती आ ६ महिनासे कमके प्रसौती महिलाके संख्या करिब एक हजार होएलासे सभी महिलाके लेल पोषण सामग्री देबेके कार्यक्रमके सुरुआत कएलगेल हए । मौलापुर नगरपालिकाके मेयर रीनाकुमारी साहके अध्यक्षतामे भेल कार्यक्रममे एक हजार महिलाके लेल एक किलोके दुगो हर्लिक्सके डिबा, एगो मछरजाली, एगो तौलिया आ सरसफाइके विभिन्न सामग्री भी प्रदान कएलगेल हए । पोषण सामग्री वितरण कार्यक्रममे जिला प्रशासन कार्यालय रौतहटके प्रशासकीय अधिकृत, मौलापुर नगरपालिकाके निमित्त प्रशासकीय प्रमुख, महिला विकास शाखाके अधिकृत तथा विभिन्न क्षेत्रके हजारो लोगके सहभागिता रहल रहे ।

इलाका प्रहरी कार्यालय गरुडाके नयाँ इन्स्पेक्टरके रेडियो मधेस मसला एफएम कएले हए स्वागत

इलाका प्रहरी कार्यालय गरुडामे आएल नयाँ इन्स्पेक्टरके रेडियो मधेस मसला स्वागत कएले हए । रेडियो मधेस मसला एफएमके कार्यालयमे ही इलाका प्रहरी कार्यालय गरुडाके नयाँ प्रहरी निरीक्षकके रुपमे आएल चतुर्भुज ओझाके स्वागत कएलगेल हए । रेडियो मधेस मसला एफएमके संचालन समितिके प्रमुख वृजकिशोर यादव, नागेन्द्र चौरसिया, स्टेशन मैनेजर मनोजकुमार चौधरी, समाचार युनिट प्रमुख सञ्जय मित्र, कार्यक्रम संयोजक राजेश्वर पाण्डे लगायत रेडियोके सम्पूर्ण कर्मचारी तथा कार्यक्रम प्रस्तोता इन्स्पेक्टर ओझाके स्वागत कएले छत । कार्यक्रममे इन्स्पेक्टर ओझा शान्ति सुरक्षाके काममे संचारकर्मीके सहयोगके अपेक्षा रहल बतएले छत । बिगतमे भी रेडियो आ इप्रकाके सुमधुर सम्बन्ध रहल जइसन इन्स्पेक्टर ओझाके कार्यकालमे भी सकारात्मक सम्बन्धके अपेक्षा रखले अपेक्षा रखले हए ।

बज्जिकाके २५ मा कार्यक्रम भव्य रुपसे सम्पन्न करेला विभिन्न उपसमितिके कएलगेल गठन

बज्जिका साहित्य संगम रौतहटके चौबिसमा कार्यक्रम रेडियो मधेस मसला एफएमके कार्यालयमे सम्पन्न भेल हए । संगमके अध्यक्ष श्याम सहनी चन्द्रांशुके अध्यक्षतामे भेल कार्यक्रममे विभिन्न रचनाकारद्वारा अनेक विधाके रचना पाठ कएलगेल हए । अइसही पचीसमा कार्यक्रमके भव्य बनाबेला विभिन्न उपसमितिके चयन भी कएलगेल हए । कार्यक्रमके भव्य बनाबेला शेख चाँद अलिके संयोजकत्वमे गठित सांस्कृतिक कार्यक्रम टोलीमे रेणुकुमारी गुप्ता, संगीताकुमारी सहनीके चयन कएलगेल हए । अइसही साहित्य रचना वाचनके लेल गठित उपसमितिमे समतोलिया मुखिया, भोला पासवान आ रामआधार पासवानके चयन कएलगेल हए । अइसही मंच व्यवस्थापनमे श्याम सहनी चन्द्रांशु, किशुन दयाल यादव आ सञ्जय मित्रके चयन कएलगेल हए । प्रचार प्रसारके जिम्मा रेडियो मधेस मसला एफएमके स्टेशन मैनेजर मनोजकुमार चौधरी आ बज्जिका पत्रकार संघ नेपालके अध्यक्ष राजेश्वर पाण्डेके देलगेल हए । बज्जिका साहित्य संगमके स्थापना आ संचालनमे सहयोग करेबाला व्यक्ति आ संस्थाके सम्मानित करेके निर्णय भी कएलगेल हए । कार्यक्रमके साहित्य, कला आ संस्कृतिसे जोडके करेके निर्णय कएलगेल हए । कार्यक्रममे भारतीय बज्जिका साहित्यकार लोगके भी सहभागिता रहेके अध्यक्ष चन्द्रांशु बतएले छत ।

स्थानीय तहमे कर्मचारी भर्नापर सरकार लगएले हए रोक

स्थानीय तहके स्थायी संगठन तथा व्यवस्थापन सर्वेक्षण नहोएलातक आन्तरिक तथा खुला प्रतिस्पर्धासे कर्मचारी पदपूर्ति नकरेके लेल आ आर्थिक भार परेबाला हिसाबसे करारमे समेत नियुक्ति नकरेला संघीय सरकार निर्देशन देले हए । देशभरके स्थानीय तहके पत्राचारमार्फत निर्देशन देइत संघीय मामला तथा सामान्य प्रशासन मन्त्रालय पदपूर्ति कएल मिललापर तत्काल ओकरा रोकेके निर्देशन समेत देले हए । मन्त्रीस्तरीय निर्णय अनुसार आन्तरिक एवं खुला तरिकासे पदपूर्ति नकरेके आ प्रक्रिया अगाडि बढल होएलापर भी स्थगित करेला स्थानीय तहके निर्देशन देलगेल हए । सरकारके एई निर्णयसे देशभरके महानगरपालिका, उपमहानगरपालिका, नगरपालिका, गाँओपालिका आ जिला समन्वय समिति स्थायी, अस्थायी एवं करारमे दोसर निर्देशन नअएलातक कर्मचारी पदपूर्ति करे नपाई ।

बारामे नदीमे डुबके एकजने बालकके भेल हए मृत्यु

बारा जिलामे नदीके पानीमे डुबके एकजने बालकके मृत्यु भेल हए । बारा जिलाके सिमरा जितपुर उपमहानगरपालिका वार्ड नम्बर १६ के पिलुआके रहनिहार  भीम बहादुर तामाङके दश बरिसके बेटाके पानीमे डुबके मृत्यु भेल हए । तामाङके दश बरिसके बेटा सरोज तामाङ शनिवारके दिन पसाहा नदीमे बान्ह बान्हेके लेल खनल खधियामे जमल पानीमे खेलेके क्रममे पइँसल आ पानीमे पइँसलापर डुबल हए । बालकके डुबलापर स्थानीय उद्धार कएले रहे लेकिन गम्भीर अवस्था होगेल रहे । गम्भीर अवस्थामे बालकके इलाजके लेल मेडिकलमे लेगेलाके पर इलाजके क्रममे ही बालकके मृत्यु भेल हए । घटनाके विषयमे बारा प्रहरी अनुसन्धान कररहल हए ।