Radio Madhesh Masla 106.4 MHz

युवाके पार्टीके प्रवेशके मुदा उठाबेबाला हए रौतहट काँग्रेस

नेपाली काँग्रेस रौतहटके सभापति कृष्णप्रसाद यादव युवा शक्तिके पार्टीमे प्रवेशके मुदा उठाबेबाला भेल छत । देशभरके नेपाली काँग्रेसके जिला सभापति लोगके हेठौडामे चलरहल भेलामे रौतहट काँग्रेसके ओरसे पार्टीके मजगुत बनाबेला युवाके प्रवेश करेके मुदा उठाबेके बतएले छत । पार्टी संचालन आ अन्य महत्वपूर्ण निर्णयमे युवाके सहभागिता अनिवार्य होएलासे नेपाली काँग्रेसके आउो मजगुत बनाबेला युवाके कान्हपर जिम्मेवारी देनाइ जरुरी रहल स्पष्ट कएले छत ।

मावि गेडहीके विद्यालय व्यवस्थापन समितिके भेल हए गठन

रौतहटके गरुडा नगरपालिका वार्ड नम्बर २ गेडहीगुठीमे रहल माध्यमिक विद्यालयमे व्यवस्थापन समितिके चयन भेल हए । एई साल चौथका बेर भेल अभिभावक भेलासे व्यवस्थापन समिति चयन करेमे अभिभावकलोग सफल भेल हए । जिला शिक्षा कार्यालय रौतहटके विद्यालय निरीक्षक उद्धव यादवके अध्यक्षतामे भेल अभिभावक भेलासे चार जने सदस्य सर्वसम्मतिसे चयन कएलगेल हए । अभिभावक भेलासे हरिलाल सहनी, जयपाल सहनी, लीलावती देवी आ रम्भा देवीके चयन सर्वसम्मत भेल हए । अभिभावक भेलासे सर्वसम्मत चार सदस्यीय समितिके चयनके बाद व्यवस्थापन समितिमे पदेन सदस्य रहेबाला वडाध्यक्ष विशुनदेव सहनी समेतके उपस्थितिमे भेल व्यवस्थापन समितिके बैठल बैठकके अध्यक्षता ज्येष्ठ सदस्यके नातासे वडाध्यक्ष विशुनदेव सहनी ही कएले रहलन । वडाध्यक्ष सहनीके अध्यक्षतामे बैठल व्यवस्थापन समितिके बैठकसे थप दूजने सदस्यके मनोनयन भी कएलगेल हए । नव मनोनीत सदस्यमे लक्ष्मी कुमारी सहनी आ राम विनय साह कानु रहल विद्यालयके प्रधान शिक्षक एवं विद्यालय व्यवस्थापन समितिके पदेन सदस्य सचिव रेणुकुमारी गुप्ता जानकारी करएले छत । विगत चार वर्षसे बेसी समयसे विद्यालयमे व्यवस्थापन समिति नरहलासे विद्यालयके बहुत काममे बाधा पुगइत आएल रहे ।

ट्रकसे आ मोटरसाइकिल ठोकएलापर चन्द्रपुरमे एकजने सशस्त्र प्रहरीके भेल हए मृत्यु

रौतहटके चन्द्रपुरमे एगो ट्रक आ एगो मोटरसाइकिल एकापसमे ठोकर मारलापर मोटरसाइकिलपर सबार एकजने सशस्त्र प्रहरीके मृत्यु भेल हए । चन्द्रपुर नगरपालिका वार्ड नम्बर ४ मे रहल पूर्व पछिम राजमार्गमे ना ५ ख ६१४२ नम्बरके ट्रक आ ना ४६ प २९८२ नम्बरके मोटरसाइकिल एकापसमे ठोकर मारलापर मोटरसाइकिल चलारहल मकवानपुर जिलाके हेठौडा उपमहानगरपालिका वार्ड नम्बर ११ नवलपुर घर होके धनुषा जिलाके नकटाझिज बेस क्याम्पमे कार्यरत सशस्त्र प्रहरी जवान २९ बरिसके राजेन्द्र न्यौपाने आ चितवन जिलाके भरतपुर महानगरपालिका वार्ड नम्बर १० घर होके नजटाझिज बेस क्याम्पमे ही कार्यरत सशस्त्र प्रहरी जवान २६ बरिसके विशाल कुमार प्रजा घाएल भेल रहे । घाएल दुनुजनेके तत्काल चपुर अस्पतालमे इलाजके लेल पेठएलापर गम्भीर घाएल राजेन्द्र न्यौपानेके इलाजके क्रममे ही मृत्यु भेल हए । ट्रक आ चालकके प्रहरी नियन्त्रणमे लेके आवश्यक कारबाही अगाडि बढरहल खबर हए ।

अत्यधिक गर्मीसे जनजीवन भेल प्रभावित

अत्यधिक गर्मीसे जनजीवन प्रभावित भेल हए । सोमवारके तुलनामे मंगलवार अत्यधिक गर्मी बढल हए । पूरा दिन एकनासके घाम उगल आ तुलनात्मक रुपसे हावा नचललासे सर्वसाधारण गर्मीसे अत्यधिक प्रभावित बनल हए । अत्यधिक गर्मी बढलासे दुपहरियामे चलेबाला स्कुल आ क्याम्पसमे विद्यार्थीके संख्या भी कम भेल हए । क्याम्पसमे करिब पचीस प्रतिशतसे विद्यार्थी कम भेल देखलगेल हए । दुपहरियामे यात्रा करेबालाके लोगके संख्यामे भी बहुत कमी आएल देखलगेल हए ।

करेन्ट लागके पर्सामे दूजनेके भेल हए मृत्यु

करेन्ट लागके पर्सा जिलामे दूजनेके मृत्यु भेल हए । पर्सा जिलाके वीरगंज महानगरपालिका वार्ड नम्बर ८ पानीटंकी टोलाम निर्माण होरहल घरमे मोटर चलाबेके क्रममे बहुदरमाई नगरपालिका वार्ड नम्बर २ के रहनिहार ४० बरिसके जोगेन्द्र राउत कुर्मीके करेन्ट लगलासे गम्भीर घाएल भेल रहे । राउतके गम्भीर हालतमे गन्डक अस्पताल वीरगंजमे इलाजके लेल भर्ना कएलगेलापर इलाजके क्रममे ही राउतके मृत्यु भेल हए । अइसही पर्सा जिलाके ही सखुवा प्रसौनी गाँओपालिका वार्ड नम्बर ४ मे रहल सडकके कातके बिजुलीके पोलमे नेपाल टेलिकमके तार जोडेके क्रममे सर्लाही जिलाके लालबन्दी नगरपालिका वार्ड नम्बर १ घर भेल एकजनेके करेन्ट लागल रहे । लालबन्दीके २४ बरिसके प्रवेश बरालके करेन्ट लगलाके बाद इलाजके लेल नारायणी उपक्षेत्रीय अस्पताल वीरगंजमे लेजाएके क्रममे रास्तामे ही मृत्यु भेल खबर प्राप्त भेल हए ।

निजगढके खानेपानी चुनावमे प्रगतिशील पक्षके पैनल ही भेल हए विजयी

खानेपानी तथा सरसफाइ उपभोक्ता संस्था निजगढके निर्वाचनमे प्रगतिशील समूह विजयी भेल हए । निर्वाचनमे नेपाल कम्युनिष्ट पार्टीके तर्फसे प्रगतिशील पैनलके अध्यक्ष पदके उमेदवार सुदर्शन प्रसाद कोइराला अपन निकटतम उमेदवार नवराज तिमल्सिनाके पराजित कके विजयी बनल हए । अइसही उपाध्यक्षमे बेनीबहादुर मोक्तान, सचिव पदपर महेश्वर अधिकारी, कोषाध्यक्षमे सम्झना लामिछाने आ सहसचिवमे सन्त बहादुर सुनुवार विजयी भेल हए । अइसही संस्थाके सदस्यमे मनोज कुमार सापकोटा, ध्रुव बहादुर ठकुरी, महिला सदस्यमे प्रमिला राउत, प्रेम कुमारी थापा, लेखा संयोजकमे रोशन तिमल्सिना आ विन्देश्वरी प्रसाद धामी विजयी भेल हए ।