गरुडाके
वार्ड नम्बर ५ मे सातगो मठमे सोलार जडान
रौतहटके
गरुडा नगरपालिका वार्ड नम्बर ५ के सातगो मठमे सोलार जडान कएलगेल हए । गरुडा नगरपालिकाके
मेयर इन्नु राय यादवके विशेष सहयोग तथा वार्ड नम्बर ५ के वडाध्यक्ष जयमंगल राय यादवके
विशेष सक्रियतामे महम्मदपुर आ लक्ष्मीपुरके सातगो मठमे सोलार प्लानल जडान कएलगेल हए
। नगरपालिकाके तरफसे विभिन्न मठमे सोलार जडान होएलासे मठके विभिन्न काम करेमे आसानी
होएके प्रतिक्रिया स्थानीयबासीके रहल हए । मठ जइसन सार्वजनिक धार्मिक स्थलमे सोलार
जडान होएलासे स्थानीयबासी हर्षित भेल शिवशंकर पाण्डे जानकारी करएले छत ।
पुरातत्व
विभागके टोली पुगल हए मौलापुरमे
रौतहटके
मौलापुरमे पुरातत्व विभागके टोली मौलापुर पुगल हए । मौलापुर नगरपालिकामे रहल पतौरामे
अवस्थित पुरातात्विक महत्वमे शिव मन्दिरके उत्खननके शिलशिलामे पुरातत्व विभागके टोली
मौलापुर पुगल हए । पुरातत्वविद तारानाथ मिश्रके नेतृत्वमे पतौरामे पुगल पुरातत्व विभागके
टोलीमे पुरातत्व विभागके पुरातत्वविद मिश्रके साथे इन्जिनियर, फोटोग्राफर सहितके टोली
आएल हए । पहिल दिन पतौराके करिब आठ सय पुरान मन्दिरके स्थलगत अवलोकन कएले आ बिफेसे
उत्खनन सुरु करेके लेल आन्तरिक तैयारी होरहल टोलीमे सहभागी बज्जिका कलाकार विजय यादव
जानकारी करएले छत ।
शिक्षक
संगठन रौतहटमे बज्जिकासेवीके भेल हए वर्चस्व कायम
नेपाल
राष्ट्रिय शिक्षक संगठन रौतहटके नयाँ कार्यसमितिमे बज्जिकासेवीके वर्चस्व कायम भेल
हए । सर्वसम्मतिसे नवनिर्वाचित कार्यसमितिके अध्यक्ष धर्मेन्द्रकुमार सिंह बज्जिका
भाषाके अपनेआपमे लमहर शुभचिन्तक छत । कार्यसमितिके उपाध्यक्ष देवेन्द्र साह त्रिभुवन
विश्वविद्यालयमे बज्जिका आ अंग्रेजी भाषाके तुलनात्मक अध्ययन कएले छत साथमे बज्जिकापर
निरन्तर काम कररहल छत । समितिके सचिव सफिन्द्रप्रसाद यादव नेपाल बज्जिका भाषा शिक्षक
प्रतिष्ठानके अध्यक्ष छत । अइसही कोषाध्यक्षमे चयन कएलगेल अनिलकुमार निधि बज्जिका भाषाके
शुभचिन्तक आ बज्जिकार्पण साहित्यिक पत्रिकाके विदेश संयोजक भी रहल छत । कार्यसमितिके
अन्य सदस्यके साथे विभिन्न नगरके कार्यसमितिके पदाधिकारी भी बज्जिकासेवी रहल छत । गरुडा
नगरपालिकाके शिक्षक संगठनके संयोजकमे चयन भेल रेणु गुप्ता बज्जिका साहित्य संगमके उपाध्यक्ष
आ बज्जिका साहित्यकार भी रहल छत । शिक्षक संगठनमे बज्जिका साहित्यकार तथा शुभचिन्तकलोगके
उपस्थिति दमदार रहलासे बज्जिका भाषाके पाठ्यपुस्तक लागू करेमे सहयोग होखेके विश्वास
कएलगेल बज्जिका साहित्य संगम रौतहटके अध्यक्ष श्याम सहनी चन्द्रांशु कएले छत ।
भारतीय
फुटबलमे भविष्य खोजरहल गरुडाके एक नवयुवक
रौतहटके
गरुडा नगरपालिकाके एक नवयुवक भारतके चण्डीगढमे फुटबल खेलइत अपन भविष्य खोजरहल हए ।
नेपालके विभिन्न स्कुलमे पढइत आ फुटबलके अभ्यास करइत आरहल अवस्थामे अग्रजलोगके सलाहसे
फुटबलमे भविष्य खोजेके लेल चण्डीगढ पहुचल हए
। गरुडा नगरपालिका ७ भीमडाबरके मुक्तिनारायण यादवके १८ बरिसके बेटा अविनाश यादव भारतके
चण्डीगढके अपोलो मिनर्वा पंजाब क्लबसे खेलरहल छत । आगामी पाँच बरिसके लेल अनुबन्धित
यादव चण्डीगढके सबसे चर्चित क्लबमे खेलइत भारतस्तरके विद्यालयस्तरके खेलमे पुरस्कृत
होगेल छत । धरानमे रहल नवज्योति बोर्डिङ स्कुलमे चार कक्षातक पढलाके बाद गरुडाके नेपाल
पुलिस स्कुलमे माध्यमिक तहके पढाइ पूरा कएले छत । शिक्षक नवीन यादव आ भवराज ठाकुरद्वारा
फुटबलके प्रशिक्षण नेपाल पुलिस स्कुलमे लेले उदीयमान फुटबल खेलाडी यादव भारतमे प्रतिष्ठित
रिलायन्स चैम्पियनशीपमे सहभागी होगेल छत । अइसही इन्डियन लिग चैम्पियनशीप मिररुवामे
अन्डर नाइन्टिनमे भी सहभागी यादव रिलायन्स युथ लिग दिल्लीके क्वालिफायरमे सहभागी होके
प्रथम स्थान प्राप्त करइत गोल्डेन बुट भी प्राप्त कएले छत । गुजरातमे सम्पन्न विद्यालयस्तरीय
राष्ट्रिय खेलकुद प्रतियोगितामे सहभागी होके फुटबलके ओर तृतीय आ मुम्बईमे सम्पन्न अइसने
प्रतियोगितामे प्रथम स्थान हासिल कएले सम्भावनायुक्त खेलाडी यादवके सपना भारतीय राष्ट्रिय
फुटबल खेलाडी बनेके हए । अपने अभी खेलरहल अपोलो मिनर्वा पंजाब टिमसे भारतीय राष्ट्रिय
फुटबल टिममे पचाससे अधिक खेलाडी सहभागी होगेल अवस्थामे अपनाके भी सभीलोग बहुत जल्दी
राष्ट्रिय टोलीमे सहभागी होएके बतारहल छत । अल इन्डिया नर्मल ट्रायल भी देचुकल नवयुवक
यादव अपन पहिचान भारतके नवयुवक खेलाडीमे होरहल आ कुछ ही बरिसमे अपने चर्चित खेलाडी
बनेके सपना देखरहल छत ।
तीन
दिवसीय फोटो पत्रकारिता तालिम गौरमे भेल सुरु
रौतहटके
गौरममे तीन दिवसीय आधारभूत फोटो पत्रकारिता सुरु भेल हए । नेपाल फोटो पत्रकार महासंघ
रौतहट शाखाद्वारा कर्मचारी मिलन केन्द्र गौरके सभा हलमे आयोजित कार्यक्रममे जिला अदालत
रौतहट गौरके माननीय न्यायाधीश लेखनाथ ढकाल, जिला खानेपानी तथा सरसफाइ डिभिजन कार्यालयके
अनिल केसरी, दुर्गा भगवती गाँओ पालिकाके प्रमुख अरुण साह, नेपाल पत्रकार महासंघ रौतहट
शाखाके अध्यक्ष रवीन्द्र साह, गढीमाई नगरपालिकाके मेयर श्याम यादव लगायतके लोगके उदघाटन
सत्रमे उपस्थिति रहल रहे । बीस जने सहभागी रहल तालिममे आर आर क्याम्पसके प्राध्यापक
विजयकुमार सिंह प्रशिक्षण देरहल छत । कार्यक्रमके संचालन गौतम श्रेष्ठ कएले रहलन ।
बुधसे
दोमासके भेल समाप्ति
हिन्दु
धर्ममे मानेजाएबाला दोमासके समापन बुधबारसे होरहल हए । हर साल करिब तीन वर्षपर एक महिनाके
लेल आबेबाला विशेष महिना दोमास एई साल जेठ महिनामे परल रहे । चैतसे कात्तिकतक मात्रे परेबाला दोमासके
अधिकमास चाहे मलमास भी कहल जाले । सामान्य महिनाके सुरुआत कृष्णपक्षसे होअले लेकिन
दोमासके सुरुआत शुक्ल पक्षसे होएके चलन हए । दोसरा महिनासे बिलकुल फरक होएलासे विशेष
धार्मिक माहनाके रुपमे दोमासके कहल जाइअ । दोमासमे कौनो धार्मिक तथा शुभ काम नकरेके
मान्यता रहल हए लेकिन धार्मिक यात्रा तथा तीर्थयात्राके साथे दानपुन करेके महिनाके
रुपमे लेल जाइअ । हिन्दू धर्मके मान्यताअनुसार दोमासके महिनामे दान कएलापर ७० गुना
बेसी फल प्राप्त होखले । घरमे नियमित पूजापाठ कएलासे विशेष पुण्यके प्राप्ति होएबाला
होएलासे दोमासके मानेबाला लोग धानपुन करते आएल हए ।
बालक
हत्याके अनुसन्धानके लेल थप एकजने पुलिस नियन्त्रणमे
रौतहटके
कटहरिया नगरपालिका वार्ड नम्बर ९ डुमरियाके १२ बरिसके बालक सन्नी देवल कहाएबाला युवराज
साहके हत्याके बाद अनुसन्धानके क्रममे थप एकजने अनुसन्धानके दायरामे आएल हए । पहिले
ही पक्राउ परल लोगके सोधपुछ कएलापर कृष्ण यादवके नाम भी अएलाके बाद सामान्य सोधपुछके
लेल नियन्त्रणमे लेल गेल हए । यादवके नियन्त्रणमे लेके जिला अदालतसे म्याद भी थप कएलगेल
खबर प्राप्त भेल हए ।
लागू
औषधसहित बारामे एकजने परल हए पक्राउ
बारा
जिलामे लागू औषधसहित एक जने पक्राउ परल हए । पर्सा जिलाके वीरगंज महानगरपालिका वार्ड
नम्बर २२ के रहनिहार ५२ बरिसके समसुदीन मियाके अवैध लागू औषध ६ किलो गाँजासहित सिमरा
उपमहानगरपालिका वार्ड नम्बर २१ मे रहल दुधौरा नदीके किनारसे बारा पुलिस पक्राउ कएले
खबर प्राप्त भेल हए ।
कोई टिप्पणी नहीं:
एक टिप्पणी भेजें