Radio Madhesh Masla 106.4 MHz

उच्च अदालतके आदेश मोताबिक कटहरिया नगरपालिकाके मेयर परल पक्राउ

कटहरिया नगरपालिकाके मेयर सियाराम कुशवाहा फिरोज पक्राउ परल हए । उच्च अदालतके आदेश मोताबिक कुशवाहा पक्राउ परल हए । देशके राजधानी काठमान्डुके शान्तिनगरसे मेयर कुशवाहा पक्राउ परल हए । पर्साके काशीनाथ तिवारीके हत्याके आरोप लागल आ पर्सा जिला अदालत कुशवाहा सफाइ देले रहे लेकिन उच्च अदालत दोषी करार करइत बीस बरिसके कैद फैसला सुनएले रहे । फैसलाके कुछ समयबाद अदालतद्वारा पक्राउ आदेश जारी होएके बाद पुलिसके खोजीके सूचीमे मेयर कुशवाहा परल रहे । मेयर कुशवाहाके बीस बरिस कैद कहल जारहल हए लेकिन कुशवाहा निकट स्रोतके मोताबिक मेयर कुशवाहा अदालतमे हाजिर भेल हए । अदालतमे हाजिर होएलाके बाद सर्वोच्च अदालतसे धरौटीमे रिहा होएके आ कुशवाहाके मेयर पद भी बरकरार रहेके दाबी कुशवाहा निकट स्रोतके रहल हए ।

जिला अस्पताल गौरके भेल हए बेहाल, अस्पताल अपने परल बेमारी

जिला अस्पताल गौरके बेहाल भेल हए । जिला अस्पताल गौरमे  रहल १७ सिप्टीमे एकोगो सुचारु नरहलासे अस्पतालके कर्मचारी अपना घरे चाहे डेरामे दिसा पिसाब करे जाएला बाध्य बनल हए । अस्पतालमे पुगेबाला रोगी आ ओकर कुरुवा सबके पैखाना आ पेसाब लगलापर बहुत छटपटाहट होरहल देखलगेल हए । कुछ लोग व्यारेक फिल्डके नजदिकमे रहल  शौचालयमे जाएके बाध्य बनल हए । रातके समयमे अस्पतालमे रहेबाला लोग अस्तालमे ही एनेओने काम चलारहल हए । सौचालय सभी खराब होगेलाके बाद भी रातमे रहेबाला लोग ओकरे उपयोग कररहल हए । सौचालय पूरा गन्हएलासे लोग आउने बेमार परेके अवस्था रहल हए । अइसही अस्पतालमे खानेपानीके भी समस्या रहल हए । खानेपानीके कौनो भी साधन नहोएलासे अस्पतालके कर्मचारी अपना घरेके बोतलमे पानी लेके काम कररहल देखलगेल हए त मरिजी आ कुरुवा बाहरसे पानी किनके अपन काम चलारहल देखलगेल हए ।

मोदीके स्वागतमे सम्पूर्ण प्रदेश ही बनल हए उत्सुक

भारतीय प्रधानमन्त्री नरेन्द्र मोदीके शुक्रबार सबेके करिब सबा नौ बजे  होरहल हए । भारतीय प्रधानमन्त्री मोदीके स्वागत करेला पूरा प्रदेश ही उत्सुक बनल हए । हर कोईके चाहना जनकपुर पुगके भारतीय प्रधानमन्त्री मोदीके अपनासे ही स्वागत करेके रहल हए । स्वागत तथा अभिनन्दन समारोहमे सहभागी होके भारतीय प्रधानमन्त्रीके प्रत्यक्ष दर्शन करेके आ अभिनन्दनके प्रत्यक्षदर्शी बनके अपने भी अपना मनसे अभिनन्दन करेके चाहना करिब सभी लोगमे देखल जारहल हए । एही कारणसे रौतहटसे हजारो लोग भारतीय प्रधानमन्त्री मोदीके अभिनन्दनमे सहभागिता जनाबे जारहल हए । जनकपुर जाए नसकेबाला लोग टेलिभिजनमे प्रत्यक्ष प्रसारण देखेके चाहे रेडियो भी सुनेके प्रयास करेके बतारहल हए । भारतीय प्रधानमन्त्री मोदीके आगमनके उत्सुकता आ अभिनन्दनके बाद हुनकासे होएबाला सम्बोधनके उत्सुकता सभीके रहल हए । शुक्रबारके दिनके ऐतिहासिक बनाबेके क्रममे बहुत लोग बिफेके दिन ही जनकपुरके ओर प्रस्थान करचुकल हए । 

केन्द्रीय अनुगमन टोली राजदेवी एफएमके कएले हए अनुगमन

लोक कल्याणकारी विज्ञापनके सम्बन्धमे स्थलगत अध्ययन भ्रमण करे रौतहट आएल केन्द्रीय टोली राजदेवी एफएमके स्थलगत भ्रमण कएले हए । सामुदायिक रेडियो प्रसारक संघ मार्फत संचार तथा सूचना प्रविधि मन्त्रालयसे उपलब्ध कराबे जाएबाला लोक कल्याणकारी विज्ञापनके सम्बन्धमे खटल अनुगमन टोली जिलाके सदरमुकाम गौरमे रहल राजदेवी एफएमके स्थलगत अनुमगन निरीक्षण कएले राजदेवी एफएमके स्टेशन मैनेजर त्रिपुरारी गुप्ता जानकारी करएले छत ।

हाथहथियारसहित पर्सामे दू जने युवक परल हए पक्राउ

पर्सा जिलामे दूजने हथियारसहित पक्राउ परल हए । पर्सा जिलाके वीरगंज उपमहानगरपालिका वार्ड नम्बर १६ भिस्वा गाँओसे दूजने पक्राउ परल हए । पक्राउ परेबालामे एकजने भारतीय आ एकजने नेपाली रहल हए । पक्राउ परेबालामे भारत बिहारके सितामढी जिलाके बैरगनिया वार्ड नम्बर १९ के ३५ बरिसके चुनचुन पटेल रहल हए । पटेलके साथे वीरगंज उपमहानगरपालिका वार्ड नम्बर १६ के रहनिहार १९ बरिसके मिथुन श्रीवास्तवके भी पर्सा पुलिस पक्राउ कएले हए । एकथान कटुवा पेस्तौलसहित पुलिस दुनुजनेके पक्राउ कएले हए । घटनाके विषयमे पुलिस अनुसन्धान कररहल हए ।

पर्सामे डुबके एकजने बालकके भेल हए मृत्यु

्पर्सा जिलामे एगो बालकके डुबके मृत्यु भेल हए । पर्सा जिलाके पर्सागढी गाँओपालिकाके वार्ड नम्बर ५ परशुरामपुरके रहनिहार शेख समिउल्लाहके १०बरिसके बेटा शेख माजित अपना साथ नहाए गेलापर पानीमे डुबके मृत्यु भेल हए । नजदिकमे रहल शेख फैयादके पोखरीमे डुबके बालकके मृत्यु भेल हए । घटनाके विषयमे पर्सा पुलिस अनुसन्धान कररहल खबर प्राप्त भेल हए ।

पर्सामे सबारी साधनके ठोकरसे एगो बालकके भेल हए मृत्यु

पर्सा जिलामे सबारी साधनके ठोकरसे एकजने बालकके मृत्यु भेल हए । वीरगंज महानगरपालिका वार्ड नम्बर ११ श्रीपुर सडक खन्डपर ना २ च ४८५२ नम्बरके टाटा पिकअपसे बिफेके दिन ठोकर लगलापर एकजने बालकके मृत्यु भेल हए । बारा जिलाके महागढीमाई नगरपालिका वार्ड नम्बर १ गंजभवानीपुरके रहनिहार सुरेन्द्र प्रसाद जैसवालके ९ बरिसके बेटा शुभम जयसवालके टाटा पिकअपसे ठोकर देलालर गम्भीर घाएल भेल रहे । गम्भीर घाएल होएलापर बालकके इलाजके लेल नेशनल मेडिकल कलेजके ओर लेजाएके क्रममे रास्तामे ही मृत्यु भेल हए । ठोकर मारके फरार रहल गाडी आ ओकर डाइबरके पुलिस खोजी कररहल हए ।